Assalamu alaikum warahmatullah wa barakatuh.Bubuhan Urang Banua, Kukula'an barata'an dimana haja ba'andak atawa bagana; nang di Kalimantan, di Jawa, di Tambilahan Riau, di Kuala Tungkal Jambi, dimana haja di sabarata'an Indonesia atawa nang di luar nagari, ayu kita basurah Basa Banjar pulang.
Kita mambahas masa'alah babarapa kata nang tamasuk jarang disambat. Napa haja kah nintu ? Baca wan janaki di bawah naya.
Babak, dalam Basa Indonesia artinya; bongkar. Misalnya; "Maraga kada pas di awak baju nintu dibabak." [Karena tak cocok di badan baju itu pun dibongkar]
Babat, artinya; ikat, atau pengikat. Misalnya; "Supaya kada taburahai kayu bapangkih naya dibabat." [Supaya tak terburai kayu api ini diikat]
Bangkang, artinya; terbuka sehingga tampak isi di dalamnya. Misalnya; "Gugur matan puhunnya mangga masak nintu bangkang." [Jatuh dari pohonnya mangga masak itu terbuka]
Bangkung, artinya; tak sesuai harapan. Misalnya; "Kajadian talalu bapilih am maka tapilih nang bangkung." [Sebab terlalu pemilih sehingga terpilih yang tak sesuai harapan]
Bangking, artinya; tumbuh atau besar tak normal, kerdil. Misalnya; "Adingmu ganal awaknya dimapa ikam maka bangking." [Adikmu badannya besar kenapa kamu yang kerdil]
Bantas, artinya; makan (kasar). Misalnya; "Mambantas haja gawianmu bagawi pangulir." [Makan saja kerjamu kerja malas]
Barak, artinya; halau, usir. Misalnya; "Liwar banyak hayam masukan ka rumah makanya kubarak." [Banyak benar ayam yang masuk ke rumah sehingga kuhalau]
Baruh, artinya; rawa, paya, kawasan yang terendam air. Misalnya; "Kita kah tulakan ma'unjun di baruh sana banyak iwaknya." [Ayo kita pergi memancing di rawa sana banyak ikannya]
Batak, artinya; tarik. Misalnya; "Batak ka siya haja mutur nang muguk nintu." [Tarik kesini saja mobil yang mogok itu]
Kikira itu haja dahulu nang kita bahas di kasampatan naya, insya Allah kainanya kita mambahas kata nang lain pulang. ©Jurnalisia™
♙10266
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.