![](https://blogger.googleusercontent.com/img/b/R29vZ2xl/AVvXsEj3Z306uVz54y78TXqsFb8I2gT9quairCfpUjsK2N3iiPfgLZ63G_s5uNkwDMzxl4wonG_BOzLCigdrM0kLfEJ7u2nJQ5leYwhrUkM6TUJ8UcspSxbCRVSeC3rqrp34UK71DxWjPPxB_25KpOFgPpeRfH-RNXby03p2-H6_CtBrnd3Y8JGRx0kw5xbVOzA/w400-h276/basa.jpg)
Bubuhan Urang Banua, Kukula'an barata'an, ayu kita basurah Basa Banjar pulang.
Di kasampatan naya kita mambahas masa'alah babarapa kata nang tamasuk jarang disambat wayah naya maraga ka'asikan basasambat dalaman Basa Indunisia. Napa haja kah nintu ? Baca wan janaki di bawah naya.
Ranai, artinya diam (Indunisia) atawa kadada nang digawi, atawa kawa jua artinya sunyi, misalnya; "imbah tahun baru pina ranai."
Rakai, artinya sama wan hancur. Biasanya dipakai gasan manyambat banda, misalnya; "tadapatnya dirumpak mutur am maka sampida nintu rakai."
Ripu, artinya kamasakan atawa liwar masak parak sudah buruk. Biasanya gasan manyambat buah. Tagal ada jua nang mamakai gasan nang lain, misalnya; "liwar kasiannya malihat si Utuh dihukum akan sampai ripu." Bayang akan haja dimapa am amun dihukum akan sampai ripu nintu.
Rumbih, dalaman Basa Indunisia kikira artinya sama wan longsor; tanah atawa tabing taturun pada andakannya. Kawa haja jua pang dipakai gasan nang lain, misalnya; "tawing rumah Abah Udin nang basamin nintu rumbih."
Runcam, nah naya pinanya kukurang labih artinya wan "runyam", misalnya; "gagara ikam pang rancanaku jadi runcam barata'an."
Rungkau, amun dalaman Basa Indunisia artinya kukurang labih wan terkam. Kawa dipakai gasan parigal satuwa (binatang) atawa jua gasan manusia, misalnya; "liwar bibinian badua nintu bakalahi barungkau."
Kikira itu haja dahulu nang kita bahas di kasampatan naya, insya Allah kainanya kita mambahas kata nang lain pulang. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.