Tanah Bumbu,"Sudah banyunya karuh, pinanya jua tacamar bahan kimia," ujar warga nang bagana kada jauh pada tawiringan Sungai Kusan di Desa Lasung Kecamatan Kusan Hulu Tanah Bumbu.
Kita sambat haja ngaran sidin, Amang Hadran, nang mengaku suah ma'ambil banyu sungai balalu sidin periksa saurang wan cara sidin.
"Suah kuperiksa banyu sungai itu, kutapis wan wadah, pina ada nang talihat asa lain, nang kaya banyu raksa (merkuri, Red) bacampur di banyu itu," kisah Amang Hadran ini.
Menurut sidin, amun banyu itu bacampur wan banyu raksa; ini liwar babahaya, jangan diminum, dimandi akan ke awak haja bisa-bisa takana penyakit.
Wayah ditakuni matan mana banyu raksa itu bisa bakambuh di banyu sungai, ujar Amang Hadran asalnya matan hulu sungai pang. Sidin sambat ada pandulangan amas di hulu Sungai Kusan itu nang memakai banyu raksa gasan memisah amas matan tanah.
"Nang setahu aku pang bubuhan nang mandulang itu ada di Mangkalapi, Canting, Pinang Habang. Bubuhan pandulangan ini pinanya nang sembarang babuang bekas pandulangan nang ada banyu raksa-nya ke sungai," ujar Amang Hadran pulang.
Belum tahu bujur kadanya kisah Amang Hadran itu, nang jelas selawas ini beluman ada bubuhan nang bawenang nang suah memeriksa banyu Sungai Kusan itu. Mudahan haja pang kaina nang hakun meneliti sungai itu nang kaya Badan Lingkungan Hidup kah. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.