Tanah Bumbu, "Sarabanya wayah ini naik haraganya alahan di musim panas ini. Amun membawa duit Rp 100 ribu babaya tahayut dapat tutukuran kada seberapa gin ai habis," ujar Acil Inur manggarunum maraga haraga taruk (sayur, Red), iwak, ayam, lombok wan lainnya banaik haraganya.
Bilungka nang asalnya sa kilo haraganya Rp 6 ribu atawa Rp 7 ribu, wayah ini banaik haraganya sampai Rp 12 ribu, kaya itu jua haraga kangkung, papari, lombok, tahu, tempe wan kakawanannya nang lain taumpat banaik antara 30 sampai parak 50 parsin.
"Sabujurnya kada kawa disambat naik harganya, tagal baganti haraga haja," ujar Pakli Bejo, penjual Sembako kuliling pakai sepeda motor.
"Pokonya wayah ini kadada nang kada naik haraganya, barataan naik, tahu haja kalo ini wayahnya musim panas; batatanam ngalih tumbuh maraga kekurangan banyu," sahut Buli Iyam, penjaja Sembako jua sidin ini kuliling komplek perumahan.
Ada jua pang nang haraganya naik kada pati banyak, nang kaya haraga ayam saikungnya antara Rp 35 ribu sampai Rp 40 ribu, imbah itu haraga iwak nang jua kada pati banyak naiknya.
Dapatnya musim panas nang kadada hujan turun, ada turun hujan tagal kaya balapai haja jua, banyak sumur nang karing kadada lagi banyunya, tapaksa atawa kada musti batukar banyu batandon nang haraganya gin malaran jua maulah salipi parak takuciak.
Han tiya, amun bubuhan pa'acilan tu manggarunum atawa bamamai maraga duit batutukar kada mayu (cukup, Red), harap dimaklumi. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.