Ratusan Baliho Pacang Caleg 'Badadai' Muha di Pinggir Jalan

courtesy : mojok.co

Kotabaru, 

Beluman ada penetapan Daftar Calon Tetap (DCT) gasan Pacang Calon Legislator (Caleg) tagal dimana-mana papak sudah bahambur baliho nang bagambar Pacang Caleg; di pinggir jalan, dimana haja nang kawa gasan ma'andak; di warung, di muka bangunan, atawa di muka rumah.

Sosialisasi ujar lainan kampanye pang, tagal ngalih jua pang membeda akan antara sosialisasi wan kampanye, maraganya ujar orang wayah ini 11-12 haja.

Badan Pengawas (Bawas) Pemilu Kabupaten Kotabaru memadah akan wayah ini sudah ada 600 lebih baliho bubuhan Pacang Caleg ini bapasang dimana-mana di wilayah Kabupaten Kotabaru. Ini kemungkinan beluman tamasuk Pacang Calon Anggota Dewan Perwakilan Daerah (DPD) nang talihat taumpat jua ada 'badadai' muha di pinggir-pingir jalan umum. 

Bawas Pemilu Kabupaten Kotabaru itu tahu ada 600 lebih baliho Pacang Caleg itu matan laporan bubuhan Panitia Pengawas (Panwas) Pemilu Kecamatan.

Makanya am Bawas Pemilu Kabupaten Kotabaru maimbau amun kawa kada usah dulu bapasang baliho atawa sapanduk maraganya DCT haja beluman ditetapkan alahan pulang am masa kampanye, maka ada baliho atawa sapanduk nang sudah batulis nomor urut.

Kada sabar pinanya bubuhan Pacang Caleg itu minta pilih, atawa handak banar dikatahuwani oleh bubuhan calon pemilihnya, makanya am nang kaya orang 'manyuntan' start; badahuluan 'badadai' muha supaya bubuhan pacang pemilih kada tasalah pilih kainanya. ©Jurnalisia™