Tanah Bumbu,Parkir di belakang Pos Kotis Polisi di Taman Edukasi Kecamatan Simpang Empat nang bahiga'an wan Pasar Minggu, sepeda motor Yamaha Vixion DA 3218 GAI nang kalirnya habang hirang; maka sawat haja dicuntan maling.
Kejadiannya Jumahat (22/09/23) sekira jam 01.30 WITeng, tengah malam, Hafid Kurniawan (20), warga Desa Sari Utama Kecamatan Sungai Loban, ma'andak sepeda motornya di belakang Pos Kotis Polisi, ditinggal akannya ke kafe Batistuta nang ada di Taman Edukasi itu.
Sepeda motor nang diparkir itu kada bakunci satang. Sekira jam 01.30 WITeng itu Hafid wan kawannya nang bangaran Doni Ahmad Almadani handak bulikan. Babaya didatangi di wadah ma'andak sepeda motor; kadada lagi talihat. Marasa sepeda motor kadada, Hafid melapor ai ke Polsek Simpang Empat.
Kada sawat lawas imbah dilapor akan, bubuhan Polsek Simpang Empat dapat am menangkap nang disangka malingnya rahatan ada di tukang paulah kunci di intangan Desa Barokah. Nang ditangkap itu bangaran Andi Ibrahima (39), warga Desa Tapus Kecamatan Kusan Hulu. Labar am malingnya dibawa ke kantor polisi. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.