Tanah Bumbu,
Rahatan ampun rumah bararabah di dalam kamarnya, pinanya maling bahimat manggalagai wan bacucuntan.
Dapatnya maling, Rp 30 jutaan duit ampun rumah laip (hilang, Red) lalu am cuma tasisa Rp 1 juta haja lagi nang beluman sawat dibelanja akan malingnya.
Ampun rumah nang kacuntanan atawa kemalingan itu bangaran Ramadani (30), warga Desa Sungai Danau Kecamatan Satui.
Maling pinanya masuk melalui lalungkang (jendela, Red) nang teralisnya matan kayu, pagat ditatak maling supaya kawa masuk ke dalam rumah.
Kabatan duit nang diandak di tuyukan baju dalam lemari; laip, taumpat jua duit nang di dalam laci lemari gasan babungas (rias, Red), wan di laci rak di kamar tamu, sabaraannya ya Rp 30 jutaan itu.
Napa ada ai pada balapor ke Polsek Satui nang kacuntanan itu. Kejadiannya hari Jumahat (08/09/23) sekira jam 14.30 WITeng di Gang Perjuangan Desa Sungai Danau.
Hari Ahat (10/09/23) sekira jam 22.00 WITeng, di muka Toko DIY di Desa Sungai Danau, Unit Reskrim Polsek Satui menangkap nang bangaran Bonjes (23), warga Desa Beruntung Raya Kecamatan Satui, nang didawa jadi malingnya. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.