Kotabaru,Talihat malining alias mulus sebagian jalan matan Lontar Pulau Laut Barat menuju Desa Kampung Baru Kecamatan Pulau Laut Tanjung Selayar nang ada di daratan Pulau Laut. Tanyaman sudah basepeda motor atawa bamotor lalu jalan situ biar cuma sapalih hanyar nang diaspal, malaran ai.
Ujar habar pengaspalan jalan itu dibiayai oleh CSR (Corporate Social Responsibility) matan PT Internasional Bulk Terminal (IBT) nang ba'andah di Mekar Putih.
IBT perusahaan nang ada kaitannya wan tambang batubara utamanya pemuatan batubara, nang sudah malaran lawas ba'andah disana.
"Pengaspalan itu dibiayai matan CSR PT IBT lainan oleh Pemkab," ujar Khairil Anwar, S.HTI, Anggota DPRD Kabupaten Kotabaru matan Partai Golkar nang adalah orang asli kampung sana.
Ujar Khairil jua, panjang nang pacangan diaspal itu sekira 9 pal.
"Mudahan ai jalan ke Teluk Tamiyang jua kaina diaspal, tanyaman ai barataan amun handak ke pantai," ujar warga baharap.
"Jalan ke Teluk Tamiyang itu sudah jua dipikir akan pacang diaspal, insya Allah di tahun 2024 kaina, kita bado'a haja," ujar Khairil pulang. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.