Tanah Bumbu,Maraga kadada bapadah alahan minta ijin ke kuwitan biniannya, sidin nang bangaran Imam Satria (22) ini dilapor akan oleh kuwitan biniannya ke Polsek Kusan Hulu imbah menikahi atawa mengawini binian nang umurnya beluman cukup 15 tahun.
Kita sambat haja singkatan ngaran biniannya, DLN, masih baumur 14 tahun 9 bulan, warga Desa Karang Mulya Kecamatan Kusan Hulu nang dinikahi oleh Imam Satria nang adalah warga Desa Sungai Loban.
Kejadiannya di rumah warga nang bangaran Guru Syukur di Desa Binawara Kecamatan Kusan Hulu, Sabtu semalam (02/09/23) sekira jam 18.40 WITeng.
Si Imam ini membawa menemui umanya si DLN, bapadah handak menikahi DLN, tagal ditangati nang uma. Ujar nang uma biniannya si Imam disuruh menemui abah bujur biniannya atawa bekas laki umanya DLN nang bangaran Salio, maraganya uma wan abah bujur DLN sudah sarak alias bapisahan.
Disuruh menemui abah biniannya, tagal pinanya si Imam ini mucil, kada mahirani papadah uma biniannya, alahan si Imam membawa DLN nikah kada bapadahan ke abah biniannya.
Karuan haja imbah ada nang mahabar akan ke Salio bahawa anak biniannya dinikahi lakian kadada sing padahan ke sidin, balalu ai sidin kada terima, alahan pulang anak biniannya itu masih beluman cukup umur, balalu ai sidin melapor ke Polsek Kusan Hulu.
Dapat laporan masalah itu Unit Reskrim Polsek Kusan Hulu mencari Imam, tadapat di Dusun Bayu Hidup di Desa Sungai Loban, diaman akan pada Ahad (03/09/23) sekira jam 23.00 WITeng. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.