Mawahnya Masa'alah Narkoba, Polres Tanah Bumbu Baulah Kampung Bebas Narkoba

ilustrasi : dokpedia

Tanah Bumbu,

Mawah banar kita wayah ini wan nang bangaran Narkoba; ada bamacam obat, nang samustinya gasan tatamba sakit garing alahan dipakai gasan kada kakaruan, dipakai gasan bamaukan. Lalu ada jua nang bangaran Sabu; nang diisap dihiut kukusnya; maulah orang kawa mauk jua, maka haraganya malaran larang.

Banyaknya nang baurusan wan Narkoba ini, makanya am Polres Tanah Bumbu wan Polsek Simpang Empat baulah kampung nang dingarani Kampung Bebas Narkoba; andakannya di Desa Plajau Mulia, desa nang hanyar dimekar akan jua tapisah pada Desa Barokah.

Masa'alah Narkoba ini di wilayah Polsek Simpang Empat malaran banyak jua kasusnya. Disini kita ungkai datanya nang diberi oleh Saruan Narkoba Polres Tanah Bumbu. Ayo dibaca sampai habis alias talah habar ini.

Data tahun 2022; di Desa Barokah ada 13 kasus, Kelurahan Tungkaran Pangeran 3 kasus, Kelurahan Kampung Baru 8 kasus, Desa Bersujud 6 kasus, Desa Sejahtera 5 kasus, Desa Sarigadung 5 kasus, Desa Gunung Besar 5 kasus, wan Desa Gunung Antasari 6 kasus.

Lalu di tahun 2022;  Desa Barokah ada 12 kasus, Kelurahan Tungkaran Pangeran 12 kasus, Kelurahan Kampung Baru 15 kasus, Desa Bersujud 7 kasus, Desa Sejahtera 6 kasus, Desa Sarigadung 12 kasus, Desa Gunung Besar 3 kasus, wan Desa Gunung Antasari 3 kasus.

Sedangkan di tahun 2023 ini beluman lumus tahun tagal sudah ada data sementara ya itu; Desa Barokah ada 11 kasus, Kelurahan Tungkaran Pangeran 1 kasus, Kelurahan Kampung Baru 8 kasus, Desa Bersujud 5 kasus, Desa Sejahtera 7 kasus, Desa Sarigadung 7 kasus, Desa Gunung Besar 2 kasus, wan Desa Gunung Antasari 4 kasus.

Kita jumlah akan kasusnya di tahun 2021 ada 51 kasus, di tahun 2022 meningkat jadi 70 kasus, sedangkan di tahun 2023 ini sudah ada 45 kasus sampai bulan September ini.

Nah, data itu hanyar di 1 Polsek haja, ya itu di Polsek Simpang Empat beluman di Polsek lainnya, pinanya amun dikumpul akan barataan bisa ratusan kasus. Ini tandanya di Tanah Bumbu ini masa'alah Narkoba ini sudah tamasuk bangat tingkat kemawahannya, kita barataan musti hati-hati jangan sampai ta'umpat ba'urusan Narkoba ini. ©Jurnalisia™