Tanah Bumbu,Mainjam sepeda motor orang tagal kada dibulik akan lagi ke ampunnya, apa yu sambatannya; penggelapan jar bubuhan polisi.
Nah, kaya itu nang digawi oleh binian ini, kita sambat haja ngarannya Ulda (20), warga Desa Dirgahayu Kecamatan Pulau Laut Utara Kotabaru.
Kejadiannya si Ulda ini sama-sama di rumah kos di Kelurahan Batulicin wan ampun sepeda motor nang bangaran Nur Halijah. Ulda bapadah mainjam sepeda motor Yamaha Vino gasan menemui kuwitannya. Hari kamarian si Ulda ini babulik ke rumah kos kada wan sepeda motor nang diinjamnya tagal diantar pakai motor.
Ditakuni kemana sepeda motor nang diinjamnya, Ulda ba'alasan ditinggal di wadah kuwitannya. Sabila ampunnya menakuni sepeda motor, alasannya kaina diambil akan di rumah kuwitannya, tagal kadada jua diambil akan. Karuan ai ampun sepeda motor melapor akan Ulda ke Polisi.
Pantas ai sepeda motor orang kada dibulik akan ke ampunnya, sekalinya sepeda motor itu disanda akan ke orang di Perumah Ar Raudah di Desa Sarigadung Kecamatan Simpang Empat. Napa ada ai si Ulda baya ditangkap polisi matan Resmob Polres Tanah Bumbu didangani Resmob Polres Kotabaru.
Maraga kejadian itu nang ampun sepeda motor rugi Rp 10 juta. Si Ulda wan barang bukti sepeda motor dibawa ke Polres Tanah Bumbu. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.