Kotabaru,Sakadanya ada 4 rumah nang kasaukutan itu kasalukutan alias kagusangan di RT 2 Desa Sembilang Kecamatan Kelumpang Tengah Kotabaru.
Bubuhan polisi disana mahabar akan, kasalukutan itu hari Arba (27/09/23) sekira jam 16.10 WITeng. Nang kaya biasa; maraga kasalukutan kadada lain nang didawa ya itu kunslit listrik.
Kisah kejadiannya dikatahuwani wayah warga bangaran Soiman duduk di ambin rumahnya melihat kukus matan dalam kamar, sangka'annya kunslit listrik. Balalu api malalar ke rumah warga bangaran Mastan nang bahiga'an di sebelah kiwa.
Angin kancang maulah api malalar ke rumah warga bangaran Kadir wan Salam nang ada disebelah kanan rumah Soiman. Rumah bubuhan warga nang bahannya matan kayu itu lakas gusang, habis wan isi-isinya.
Api hanyar kawa dipakahi sekira jam 17.30 WITeng oleh Tim Pemadam Kebakaran Garuda matan Desa Geronggang nang didangani bubuhan orang kampung wan bubuhan Polsek, jua ada nang matan perusahaan.
Kadada nang luka atawa sampai meninggal, kerugian maraga kasalukutan itu barataan ditaksir Rp 350 jutaan. ©Jurnalisia™
Jurnalis : Agus Ariyanto
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.