Kotabaru,Sebujurnya sudah lawas masa'alah ini, sudah batahun-tahun, tagal kadada jua belum tatamu jalan keluarnya.
Masa'alah bubuhan nelayan; antara nelayan di Lontar Pulau Laut Barat Kotabaru wan bubuhan nelayan Pagatan Tanah Bumbu.
Bubuhannya itu bahualan masa'alah wilayah penangkapan iwak di laut.
Sudah jua kedua pihak batamuan di Banjarmasin gasan mencari jalan keluar nang jua dihadiri oleh Dinas Perikanan matan 2 kabupaten, pawakilan bubuhan nelayan. Tagal tetap jua masih beluman tatamu kesepakatan alias beluman taparukui.
"Kahandak kami disini bubuhan nelayan Pagatan itu jangan menangkap iwak sejauh 3 mil parak wadah kami. Alahan ada nang sampai masuk 1 mil, apa pang lagi pakulihan kami disini," ujar Ahmar, Ketua bubuhan Nelayan di Lontar.
"Kita handaknya sama-sama haja kawa bacari, kadada batangatan kaya itu. Alat tangkap iwak bubuhan nelayan Pagatan itu sudah ramah lingkungan jua," ujar H. Kasim, Ketua Himpunan Nelayan Seluruh Indonesia (HSNI) Kabupaten Tanah Bumbu.
Ditambah akan Ahmar, bubuhan nelayan Pagatan itu pakai kapal nang ukuran 5 GT wan alat tangkap nang harap, sedangkan bubuhan nelayan Lontar pakai kapal ukuran 3 GT wan alat tangkap masih ada nang tradisional. Itu am makanya bubuhan nelayan Lontar manangati jangan sampai menangkap iwak di wadah nang biasa bubuhan nelayan Lontar bagawi.
Menanggapi masa'alah bahualan bubuhan nelayan itu, Wakil Ketua DPRD Propinsi Kalsel, M. Syaripuddin, SE, M.AP berencana pacang mencari akan jalan keluarnya supaya bubuhannya itu kawa taparukui supaya nyaman barataan bagawi. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.