Banjarmasin,Bang Dhin, kiyawan Wakil Ketua DPRD Propinsi Kalsel, M. Syaripuddin, SE, M.AP, baharap di banua kita Kalsel ini ada rumah sakit nang diulah oleh Kementerian Kesehatan RI.
Ujar Sidin ini, bubuhan Dewan atawa DPRD Propinsi Kalsel wan Pemprop wan jua jajaran lainnya siap mausul akan ke Pemerintah Pusat.
Wacana itu maingat andakan Propinsi Kalsel nang diancang-ancang jadi penyangga Ibu Kota Negara (IKN), makanya usulan semacam itu dianggap pas haja. Alahan wacana itu sudah disampai akan wayah ada rapat antara Komisi V DPRD Propinsi Kalsel wan jajaran Dinas Kesehatan jua RSUD Ulin Banjarmasin hanyar-hanyar ini.
"Adanya usulan itu kada ba'arti atawa ma'anggap pelayanan RSUD Ulin itu kada bagus, tagal basiap gasan jadi penyangga IKN. Wan jua pelayanan kesehatan gasan bubuhan masyarakat musti diantisipasi gasan tahun-tahun di hadap kaina," ujar Bang Dhin nang pina kadada muyak-muyaknya maulah macam-macam usulan gasan bubuhan masyarakat banua ini.
Wayah ini ujar Bang Dhin pulang, RSUD Ulin ini sudah cukupan baik pelayanannya. Peralatan kesehatan di RSUD Ulin ini jua sudah jadi semacam contoh oleh rumah sakit nang ada di Kalimantan.
"Diharap akan adanya rumah sakit pemerintah nang lain; pacangan makin membuka ruang pelayanan nang lebih bagus wan ancap gasan bubuhan masyarakat," harapan Bang Dhin. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.