Bahualan Wan Panjual Pantul Kena Timpas Di Kepala

foto : ilustrasi

Tanah Bumbu,

Bahualan wan panjual pantul. Belum dikatahuwani apa maraganya maka panjual ini manimpas ke nang mahualinya.

Kejadiannya di Desa Makmur Jaya Kecamatan Satui Kabupaten Tanah Bumbu, Ahat (24/09/23) sekira jam 11.00 WITeng, di muka warung bajual bakso Gajah Mungkur.

Sayipul Anwar (34), warga Desa Makmur Jaya Kecamatan Satui, nang ditimpas panjual pantul nang bangaran Syahrani.

Kisahnya wayah itu si Sayipul alias Ipul ini mendatangi Syahrani nang rahatan manunjul garubak pantulnya. Imbah itu badua itu bahualan. Balalu panjual pantul ma'ambil parang, manimpas Ipul nang takana di intangan kepala wan pinggang sebelah kiri belakang. 

Imbah manimpas Ipul, si panjual pantul bukah. Ipul nang luka-luka maraga timpasan itu dibawa ke klinik, imbah itu dibawa ke rumah sakit di Banjarmasin.

Kejadian itu dilapor akan ke Polsek Satui. Belum dikatahuwani si panjual ini kemana bukahnya. ©Jurnalisia™