Kotabaru, Sudah balakian wan baisian anak, sidin ini asli orang Kotabaru, ngaran asidin Aditya Rosalina, sidin bagawi di Lapas Kelas IIA Kotabaru.
Acil Aditya ini jadi Kepala Sub Seksi atawa Kasubsi Bimbingan Kemasyarakatan dan Perawatan (Bimkemaswat) di Lapas kelas IIA kotabaru, nang gawiannya manggaduh bubuhan tahanan atawa warga binaan supaya kainanya jadi manusia nang baik amun sudah bebas keluar Lapas.
Harat sidin ini, kawa membagi waktu; mana maurusi rumah tangga; anak wan laki, tagal jua maurusi banyak gawian nang lain di Lapas.
Kuwitan sidin jua pegawai nang dahulunya bagawi di Pemkab Kotabaru, pinanya menurun ta ka sidin jua. Alahan lagi gawian sidin di Lapas ini didukung wan dkatujui oleh atasan sidin nang bangaran Yosef Benyamin Yembise.
Nang sudah digawi Acil Aditya ini ya itu melajari bubuhan warga binaan supaya kawa baca tulis, mendatang akan tuan guru gasan melajari membaca quran wan jua bacaramah. Selain itu jua diada akan wadah gasan baobat (klinik), jua dilajari bamacam kerajinan wan dimapa bausaha.
Adanya bamacam gawian nang diberi akan ke bubuhan warga binaan itu; Lapas itu kada lagi dianggap marma alias seram atawa angker oleh banyak orang.
Acil Aditya ini ibarat kaya Srikandi, binian nang harat di kisah pewayangan, baharap banyak kainanya binian nang kaya sidin ini. ©Jurnalisia™
Penulis : Agus Ariyanto
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.