Tanah Bumbu,Ujar orang jua; umur kada babau. Kadada nang tahunya pacang pabila meninggal.
Sidin ini, Rizal Mahdi, bekas alias Mantan Anggota DPRD Kabupaten Tanah Bumbu, meninggal malam tadi, Minggu (27/08/23). Padahal sehari sebelumannya, Sabtu, sidin ini umpat jua datang mahadiri acara reuni bubuhan Anggota DPRD Kabupaten Tanah Bumbu Periode 2004 sampai 2019 di Hotel Medina Pagatan.
Kada pati kawa bajalan wayah itu sidin ini, diantar basepeda motor, bajalan gin ai sempat digandeng oleh Ketua DPRD Kabupaten Tanah Bumbu, Andrean Atma Maulani wan Fauzi Laterick Sedar nang jua bekas Anggota DPRD Kabupaten Tanah Bumbu.
Rizal Mahdi ini sebeluman jadi Anggota DPRD, sidin jadi Pembakal di Jukueja Kecamatan Kusan Hilir. Imbah itu mencaleg, tapilih jadi Anggota DPRD. Imbah itu sidin mencaleg pulang tagal kada tapilih, sidin mencalon pacang Pembakal; tapilih jadi Pembakal pulang di Jukueja.
"Sempat babalasan di WA malam tadi sebeluman sidin meninggal," ujar Masmur, bekas Anggota DPRD Kabupaten Tanah Bumbu.
Innalillah wa inna ilaihi rajiun........insya Allah barataan pasti menyusul pian tagal pian badahulu haja. Mudahan diterima barataan amal ibadah oleh Allah SWT, diampuni barataan kesalahan wan dosa. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.