Tanah Bumbu,Maraganya cangang-cangang ke Pelaku haja, maka bakalahian.
Kisahnya bamula waktu korban bangaran M. Rindi wan kawannya bangaran Madan, bailang ke rumah kontarakan kawannya binian bangaran Widya di Jl. MGR Desa Sinar Bulan Kecamatan Satui, Ahad (13/08/23).
Sesampai di rumah Widya, korban melihat ada lakian nang inya kada patuh rahatan membaiki sepeda motornya di intangan rumah Widya. Merasa kada patuh wan lakian itu korban kada ai managur, tagal langsung masuk ke dalam rumah Widya, balalu duduk wan kawannya di ruangan tengah.
Kada sa apa lawas lakian (Pelaku, Red) nang di luar rumah Widya itu masuk ke dalam rumah Widya ma'ambil lading gasan membaiki sepeda motornya nang rusak.
Imbah itu si Pelaku ini manulih ke ampah korban sambil bapandir, "kenapa cangang-cangan, sangkal kah ?" Imbah itu si Pelaku manunjul korban beberapa kali, lalu ai bakalahian wan tangan haja, dihalati oleh bubuhan nang melihat balalu ampihan bakalahian.
Pelaku wan korban bulikan matan rumah Widya. Tagal ponsel korban tatinggal di rumah Widya, lalu babulik pulang ke rumah Widya ma'ambil ponsel. Disini korban batamuan pulang wan pelaku, wayah itu pelaku sudan membawa parang, balalu manimpas korban sebanyak 3 kali, takana bagian kepala korban, rabit am kepala korban, makanya am korban melapor ke Polsek Satui.
Unit Reskrim Polsek Satui nang menerima laporan, Sanayan (14/08/23), sakira jam 03.00 WITeng, menangkap Muhammad Attu Sukri Nawawi (23), warga Tanah Laut nang manimpas M. Rindi (20), lakian, Mahasiswa, warga Desa Sungai Danau. ©Jurnalisia™
*Isi Berita Dalam Dialek Kuala
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.