Liwar, Bini Orang Dikuhup Dalam Kamar Diancam Handak Dibunuh

Tanah Bumbu,

Liwar sidin ini padahal sudah bagalar haji, kita sambut haja ngarannya H. Sup (32), warga Desa Makmur Mulia Kecamatan Satui, tagal kelakuan mambari supan.

H. Sup ini bakiau bini orang nang bangaran DS (25), warga Desa Tanjung Dewa Kecamatan Panyipatan Tanah Laut, supaya datang ke rumahnya. Imbah sampai di rumah, H. Sup ini bapaksa'an mahirit DS masuk ke dalam kamarnya (manguhup), balalu dikuncinya kamar imbah si DS ini sudah di dalam kamar.

H. Sup ini ba'abutan di dalam kamar wan DS. H. Sup mencabut lading sambil manating ampah ke DS sambil baucap; tahu lading lah, minta dibunuh kah ?

Lading diampah akan ke parut DS tagal tangan H. Sup ditangkap wan di'ingkuti DS. Imbah itu lading diampah akan pulang ke dada, ditangkap DS pulang, kedua tangan H. Sup di'ingkuti DS, tagal dada DS bagian kanan sampat luka takana lading.

Imbah itu H. Sup ini minum Miras sambil terus bamamai. Sakira 1 jam imbah itu DS dipindah ke kamar lain, dikunci jua kamarnya matan dalam. Sakira jam 09.00 WITeng, DS bapadah ke H. Sup minta bulik dulu ma'ambili anaknya nang sakulah. Dibari akan bulik tagal DS musti babulik kesini pulang, bila kada babulik maka DS pacangan dibunuh. 

Maraga supaya kawa keluar matan kamar itu DS ma'iyakan ai. Imbah sudah kawa keluar DS bulik ke rumahnya, bahabar ke lakinya masalah kejadian nang dialaminya. Imbah itu dua laki bini itu melapor ke Polsek Satui.

Mendapat laporan itu Polsek Satui dipimpin Kanit Reskrim menangkap H. Sup di rumahnya tamasuk wan barang bukti. Belum dikatahuwani apa masalah sabujurnya kejadian itu, masih diselidiki Polisi. ©Jurnalisia™

*Isi Berita Dalam Dialek Kuala