Kotabaru,Dendam wan sakit hati jar kanakan ini masih baumur sakira 15 tahunan, makanya am manyalukut rumah orang, mengaku 4 kali manyalukut di daerah nang sama; di Gunung Tampurung Kelurahan Baharu Selatan Kecamatan Pulau Laut Sigam Kotabaru.
Kejadian manyalukut rumah orang am makanya ditangkap bubuhan Buser Satreskrim Polres Kotabaru. Pelakunya kita sambat haja AAM, warga Gunung Tampurung.
Pamula'annya si AAM ini manyalukut rumah ampun Siswanto, ditimbainya puntung roko masih banyala ke dalam rumah melalui lalungkang nang kada batutup. Maraganya si Siswanto ini orangnya panggaduhan.
Imbah itu nang kedua, rumah ampun Anton nang puang kadada'an orangnya. Si AAM ini mengaku dendam wan sakit hati ke anak Anton maraganya anak Anton ini suah mendawa inya manyuntan duit wan baju.
Rumah warga bangaran Surianyah; disalukutnya jua oleh si AAM ini wayah orang rumah rahatan guring. Kain nang banyala dikajal akannya ke dinding rumah.
Liwar jua si AAM ini Langgar Darul Muslimin gin ai disalukutnya jua, dicuculnya kain diandaknya di bawah lawang langgar.
Maraga si AAM ini sawat manyalukut langgar ini inya merasa sakit hati wan pandiran bubuhan warga nang bapandir kaya ini, "ba'apa ikam di langgar, kadada gunanya jua." ©Jurnalisia™
Jurnalis : Agus Ariyanto
*Isi Berita Dalam Dialek Kuala
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.