Puisi (Bahasa Banjar) | Satabul

Mahindangut,

Manangadah malihat langit, 

Kadap salau-salau,

Bintang sa'ikitannya, 

 Bulan baluman bangsul.

Talimpua magrib, 

Parak ta ka isya, 

Masih haja jua mahindangut, 

Balum ada talihat bigi mata, 

Rarasa balum jua ada nang pacang bapara, 

 Alahan pulang nang baparak.

Dingin mulai karasa'an, 

Angin malam batiup, 

Masuk manyucuk kulimbit, 

Tarasa inggan ka buku lali. 

Sa'apa lawas lagi naya mahadang, 

Pabila jua ampih mahindangut, 

Mana lalakiannya, Kamana'an bubuhannya, 

Nang biasa atawa suah manggamit, 

Mambawa bajalanan, 

Mambawa makanan, 

Mambawa minuman, 

Mambawa banyanyian, 

Mambawa ba'igalan kaya urang kasarungan, 

Mambawa ka lusmin, 

Mambawa ka hutil, 

Atawa mambawa sahibar ka buncu kadap, 

Mambawa guringan satumat tagal kada janak, 

Mambawa ba'ungga-ungga apung, 

 Imbah nintu mambari karatas nang payu.

Akayah, 

Maristanya diri naya, 

Kada kawa ba'apa-apa, 

Sahibar bajual diri, 

Bajual nang satabul, 

Padahal liwar sakit parasa, 

Imbah dimapa pang lagi, 

Bakuciak hangkui, 

Kada didangar urang, 

Manangis gin ai, 

Dipadahkan urang pura-pura, 

Babunuh diri, Gair wan takutan jua, 

Tapaksa manyandang, 

Manyandang inggan kada tahan lagi. (ISP)

*Mohon maaf kami tak menerjemahkan ke Bahasa Indonesia dengan alasan pelestarian Bahasa Banjar.