"Ka, pabila kita nikahan ? Muyak sudah ulun nang kaya naya haja, sudah babulan-bulan sarumah, asa bangang talinga ulun mandangar kuya'an urang higa mahiga," Bainah manyintak tangan Iyan nang handak kaluar pada muhara lawang rumah bidakan nang sudah parak lima bulan naya disiwa."Sabar haja pang ikam. Aku ni sambilan mancari gawian nang manatap dahulu. Dimapa amun kita nikah kaina aku masih nang kaya naya haja sapancari sapangikih kaya ayam," Iyan manjawap lakun pina sangit balalu bajalan mangunyur kaluar rumah.
Bainah mandam ta'ungut imbah Iyan kadada lagi di rumah. Sudah babarapa kali Bainah manakuni wan mandasak Iyan supaya manikahi inya, tagal jawapan Iyan kaya nintu tarus.
Bainah ka'ingatan rahat pamula'an batamuan Iyan. Bainah langsung hakun dibawai Iyan hidup sarumah. Naya lantaran Iyan bajanji salakasnya pacang manikahi.
"Ulun muyak sudah ba'ulah dusa saban hari. Gawian malahung naya kada pacang sa'umur hidup dijalani. Ulun pacangan tuha, kalirut, kada payu lagi. Ulun handak jua barumah batangga; ba'isi laki wan anak," Bainah ma'ungkai barata'an isi hatinya ka Iyan wayah nintu.
Iyan nang mandangar barata'an isi hati Bainah nang marista nintu, marasa ta'umpat jua marista, ragapannya magin bapisit ka Bainah.
"Inggih Ding ai, aku mangarti wan paham banar sudah ka'ada'an ikam kaya naya. Aku janji pacang manikahi ikam, mambahagia'akan ikam biar ikam naya bakas pakaiAN urang banyak," ujar Iyan sambil manjanaki muha Bainah nang talihat tapancar banyu mata mandangar pandiran Iyan.
"Ulun bajanji kada manarima urang nang handak mamakai ulun lagi," Bainah ba'ucap sambil manyapu banyu matanya wan karatas tisu.
Iyan nang jadi harapan Bainah naya sabujurnya langganan Bainah jua. Tagal matan barata'an lakian nang suah mangguringi Bainah, Iyan naya balain; parhatian, kada suah kasar bapandir, wan lakun kaya urang bapacaran. Makanya am Bainah kada kawa ba'indah rahat Iyan handak wan inya.
Iyan naya lakian nang kada ru'us wan kada pasti napa gawiannya. Imbah anu umpat mamarkir kandara'an imbah anu jar umpat managih akan hutang urang. Nang tahu pasti nintu Iyan naya Pariman Pasar jar urang banyak bapandir.
"Biar haja dahulu gawian ikam nintu. Kaya biasa haja, tarima haja amun ada nang handak mangguringi ikam kacuali amun kita kaina sudah nikahan rasmi," ujar Iyan wayah nintu.
"Napa jadi pian kaya nintu, kada camburu lah pian amun malihat ulun dibawa lakian lain ?" takun Bainah hiran.
"Kada Ding ai. Aku manangat ikam amun ikam sudah kunikahi. Aku indah wayah naya manangat nang masih jadi hak ikam," sahut Iyan sambil ma'ingkut tangan Bainah.
Salawas lima bulanan naya sakalinya Iyan pina kada igul-igul handak manikahi, Bainah jadi mantah bapikir wan baharap ka Iyan. Alahan pulang Iyan pinanya tambah manjadi-jadi kalakuan salawas wan Bainah. Iyan kada cuma bisa minum bamaukan, jua bisa ma'ubat wan umpat manyabu. Kada jarang Iyan amun sudah handak manyabu nintu; marunca minta duit ka Bainah. Wan sudah kada sakali dua Bainah kana tampiling Iyan maraga kada hakun mambari duit.
"Amun nang kaya naya haja kajadiannya kadada pa'ampihannya bahujung tuha kalirut ma'ungkusi urang wara. Jadi hulun aku naya disuruh bajual awak. Sarabanya, mana diguringi parai, duit saurang pulang nang ditumbasnya," hati Bainah manggaritik.
Saking sangkalnya Bainah ma'ingat kalakuan Iyan, kada karasa'an inya lintuk taguring tajalapak di lantai babantal pagalangan tangan. Malaran lawas pinanya Bainah taguring. Pas tabangun hari sudah parak sanja, tadangar urang azan di langgar, wan parut Bainah tarasa garurukan kaya di'amuk cacing.
"Parai jua ka'imbahannya amun kaya naya. Baik aku babulik ha kaya dahulu. Kada usah baharap dapat laki lagi. Amun sudah mimang bajuduh, kaina tadapat ai saurangannya. Kada mungkin jua bajuduh wan tunggul kayu," Bainah tapandir dalam hati. (ISP)
*Kesamaan nama, karakter, tempat, lokasi dan lainnya hanyalah kebetulan, tulisan ini fiktif dan fiksi.
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.