 |
| ilustrasi : foto (solopos) |
"Labar am amun ikam kaya nintu kada kawa mamilih. Ikam pasti kawa sabujurnya mamilih. Antara aku wan inya musti ikam tahu balain," Iyar mandasak Minah supaya kawa manantu akan pilihan.
Minah bahinip mandangar Iyar mandasak. Mandam inya ma'itihi lantai.
"Nang jalas nintu aku bujangan kada ba'isian bini, sadangkan inya nintu ada ba'isian bini wan anak dua ikung," Iyar ta'ungkai satatus lakian nang handak jua wan Minah nintu, Iyar sahibar ma'ingat akan Minah.
Sudah ampat bulan labih Iyar bahandakan wan Minah. Salawas nintu Iyar hanyar samalam ba'isukan mandangar bahawa Minah nintu ada jua bahandakan wan lakian lain. Habar naya datang matan Rusli, kawan Iyar.
"Dimapa sudah ikam wan Minah ?" takun Rusli samalam rahatan di warung katupat Acil Murni.
"Baik haja pang kaya biasa ai, napa am ?" sahut Iyar.
"Kada ai. Tagal aku handak mamadahkan ikam banar haja kalu Minah nintu bahandakan jua wan lakian lain, ngarannya Madi, ikam gin ai tahu urangnya," habar Rusli.
Takajut jua pang Iyar mandangar habar Rusli naya, tagal inya kawa manahan rasa sakira kada talihat kaya urang takajut.
"Damintu kah. Madi nang bagawi manyupir mutur ampun Haji Latip nintu kah, nang ba'isi anak dua ?" takun Iyar.
"Pas banar, kada tasalah lagi," ujar Rusli sambil ma'angkat indung jariji tangan.
Dalam hati Iyar, jadi salawas naya inya dicabang akan ulih Minah wan urang lain, lakian ba'isi bini wan anak ha pulang. Napa parigal, kurang napa garang aku naya; kaya urang jua, bujangan, kada bataha ada binian nang pacang ma'amuki.
"Sudah gin dahulu Ka ai. Wayah naya ulun baluman kawa mambari kaputusan. Ulun parlu bapikir gasan mamilih antara pian wan inya. Ulun bulik gin ai," Minah ba'ucap baluman kawa mamilih.
Iyar nang tadi sampat malamun mahadang jawaban Minah, takurijat mandangar pandiran Minah.
"Ayu ai amun kaya nintu ikam parlu bapikir dahulu. Aku mahadang haja jawaban ikam kaina," ujar Iyar.
Limpua saminggu sudah baluman ada habar matan Minah parigal kaputusan mamilih antara Iyar wan Madi. Saban handak guring Iyar tapikir akan tarus parigal naya.
"Mudahan haja pang aku nang dipilih Minah. Asa kada kawa lagi aku mambuang rasa naya salain Minah haja sa'ikung," Iyar bapandir dalam hati.
Parahatan minum kupi di warung Acil Jainab, kawan Minah nang bangaran Idah mahiyau Iyar.
"Napa am ikam mahiyau aku ?" takun Iyar kaya babisik takutan didangar urang.
"Minah ada di rumahku. Inya minta hiyaukan ikam wayah naya jua," sahut Idah sama kaya babisik jua.
"Hi'ih, ayuha ikam badahulu ka rumah," ujar Iyar.
Kada pati lawas Iyar sampai di rumah Idah. Di siya cuma ada Minah wan Idah nang ampun rumah. Kuwitan Idah kadada'an; bajualan pancarakinan di pasar.
"Aku ka subalah dahulu lah, ka rumah jiran. Ayuha bapandiran sampai tuntung," Idah parmisi sambil lihum, lakun paham wan tamunya.
"Hi'ih, tarimakasih Dah lah," ujar Iyar sambil mamaraki Minah nang baduduk balapak di lantai.
Malaran lawas Iyar wan Minah badidiaman kada sing pandiran. Minah mandam ma'itihi ka luar rumah, Iyar lakun haur mancabuti janggut nang kada talihat tumbuh.
"Ulun mamilih Madi !" Minah bagasut bapandir.
Iyar liwar takajut mandangar, parak taluncat.
"Kada tasalah dangar kah aku ?" takun Iyar pina marista.
"Kada. Ulun tadi ba'ucap napa garang ?" takun Minah ma'itihi langsung mata Iyar.
"Jar ikam mamilih Madi," Iyar manyahut sambil bapaling ampah ka lain, kada sanggup lagi ma'itihi Minah.
"Maksut ulun.....ulun mamilih mambuang Madi," tadangar suara Minah gamat.
"Bujuran kah ? Ikam mamilih aku ? Kada tamimpi kah kita ?" Iyar lakun kada parcaya.
"Akay, sakit !" Iyar takuciak kana kibit Minah di paha.
"Han tiya ulun kibit. Kada tamimpi kalu pian," Minah tatawa sambil bajauh kalu pina kana kibit balasan. (Imi Surya Putra)
*Mohon maaf untuk memperkenalkan dan melestarikan Bahasa Banjar (Kalimantan), maka tak pakai terjemahan.
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.